Mar 7 | PltULB | STEP | Ireo fariseo sy ny mpanoradalana sasany izay avy any Jerosalema dia tonga niangona nanodidina Azy.

Mark 7

1 Ireo fariseo sy ny mpanoradalana sasany izay avy any Jerosalema dia tonga niangona nanodidina Azy.

2 Ary hitan’izy ireo ny mpianany sasany nihinana mofo tamin’ny tanana tsy voadio, izany hoe, tsy voasasa. 3 (Fa ny Fariseo sy ny Jiosy rehetra dia tsy mba mihinana raha tsy efa nanasa ny tanan’izy ireo, satria manaraka ny fombafomban’ireo loholona.) 4 Ary rehefa miverina avy any an-tsena ireo Fariseo, dia tsy mihinana izy ireo raha tsy avy mandro, ary mitandrina fomba maro hafa fatratra izy ireo, tahaka ny fanasana ny kapoaka, sy ny famarana, sy fanaka varahina, ary ny fandriana izay ihinanan’izy ireo.)

5 Ireo Fariseo sy ny mpanoradalana nanontany an’ny Jesosy hoe: “Nahoana ny mpianatrao no tsy mandeha araka ny fombafomban’ireo loholona, fa mihinana ny mofon’izy ireo amin’ny tanana tsy voasasa?”

6 Nefa hoy Izy tamin’izy ireo: “Isaia naminany tsara momba anareo mpihatsaravelatsihy. Nosoratany hoe: ‘Ity vahoaka ity manaja Ahy amin’ ny molony, fa ny fony kosa lavitra Ahy. 7 Foana ny fivavahana atolotr’izy ireo Ahy, raha mampianatra ny fitsipik’olombelona ho fampianaran’izy ireo.’

8 Afoinareo ny didin’Andriamanitra ka hazoninareo mafy ny fomban’ny olona.” 9 Ary hoy ihany koa Izy tamin’izy ireo: “Tahaka ny ahoana ny fanarinareo ny didin’ Andriamanitra mba hitandremanareo ny fomban-drazanareo! 10 Fa hoy Mosesy: ‘Manajà ny rainao sy ny reninao,’ ary koa, ‘Izay miteny ratsy ny rainy na ny reniny dia ho faty tokoa.’

11 Kanefa ianareo miteny hoe: ‘Raha misy lehilahy iray miteny ny rainy na ny reniny hoe: “Na inona na inona tianao ho azo tamiko dia efa Korbana,”’ ( izany hoe: ‘Nomena an‘Andriamanitra’) -- 12 dia tsy avelanareo hanao na inona na inona amin’ny rainy sy ny reniny intsony izy. 13 Manafoana ny tenin’ Andriamanitra ianareo noho ny fomban-drazanareo izay notananareo. Ary zavatra maro mitovy amin’izany koa no ataonareo.”

14 Ary niantso ny vahoaka indray Izy ka niteny tamin’izy ireo hoe: “Mihainoa Ahy, ianareo rehetra, ka fantaro. 15 Tsy misy zavatra avy eo ivelany izay miditra ao anatin’ny olona ka afaka mahaloto azy rehefa miditra ao aminy. Fa izay mivoaka avy ao anatin’ny olona no mahaloto azy.” 16 [Ny fandikana tsara indrindra dia tsy manisy ny andininy faha 16: Raha misy manan-tsofina hihainoana, aoka izy hihaino.]

17 Ary rehefa niala teo amin’ny vahoaka Jesosy ka niditra tao an-trano, ny mpianany nanontany Azy momba ilay fanoharana. 18 Hoy Jesosy taminy: “Ianareo koa ve mbola tsy manana fahalalana? Tsy hitanareo ve fa izay rehetra miditra ao anatin’ny olona avy any ivelany dia tsy mahaloto azy, 19 satria tsy afa-miditra ao am-pony izany, fa ao an-kibony ihany ka mivoaka any amin’ny fivoahana?” Tamin’izany fanambarana izany dia nahatonga ny hanina rehetra ho madio i Jesosy.

20 Hoy Izy: “Izay mivoaka avy ao amin’ny olona no mahaloto azy. 21 Fa avy ao anatin’ny olona, avy ao am-pony, no ivoahan’ny sain-ratsy, ny fahavetavetana, ny halatra, ny famonoan’olona, 22 ny fijangajangana, ny fitsiriritana, ny haratsiam-panahy, ny fitaka, ny fijejojejoana, ny fialonana, ny fiampangana lainga, ny avonavona, ny hadalana. 23 Izany zava-dratsy rehetra izany no mivoaka avy ao anatin’ny olona, ary ireo no mahaloto azy.”

24 Niala teo Izy ka lasa nandeha tany amin’ny faritry Tyro sy Sidona. Niditra tao an-trano iray Izy ary tsy tiany ho fantatr’iza na iza fa tao Izy, kanefa tsy afaka niery. 25 Kanefa niaraka tamin’izay dia nisy vehivavy iray, izay nisy fanahy maloto iray ny zanany vavy kely, nandre ny aminy, tonga, ary niankohoka teo an-tongony. 26 Ary Grika ilay vehivavy, Syro-foinika no niaviany. Niangavy Taminy izy mba hamoaka ny demonia hiala amin’ny zanany vavy.

27 Hoy Izy taminy: “Aoka homen-kanina aloha ny zaza. Satria tsy mety ny maka ny mofon-jaza ka manipy azy ho an’ny amboa.” 28 Nefa namaly izy ka nanao Taminy hoe: “Eny, Tompo, fa na ny amboa ao ambany latabatra aza dia mba mihinana ny sombintsombiny amin’ny mofon-jaza.”

29 Dia hoy Izy taminy: “Noho izany teninao izany, afaka mandeha ianao. Efa nivoaka tamin’ny zanakao vavy ny demonia”. 30 Ary raha niverina tany an-tranony ravehivavy dia nahita ny zaza nandry teo ambonin’ny farafara, ary ny demonia efa niala.

31 Ary Jesosy nivoaka indray niala ny faritry Tyro, dia namaky an’i Sidona hatrany amin’ny Ranomasin’ny Galilia ka niakatra ny faritry Dekapolisy. 32 Ary nentin’izy ireo teo Aminy ny olona iray marenina sady sahirana raha miteny, ary nitalaho Taminy izy ireo mba hametrahany ny tanany aminy.

33 Nitondra an-dralehilahy nitokana niala teo amin’ny vahoaka Izy, dia nametraka ny rantsan-tanany tao an-tsofiny Izy, ary raha avy nandrora, dia nikasika ny lelany. 34 Dia niandrandra ny lanitra Izy, dia nisento ka nanao taminy hoe: “Efata,” izany hoe: “Maladia!” 35 Ary haingana teo ny sofiny dia nalady, ary izay namehy ny lelany dia potika ary afaka niteny mazava tsara izy.

36 Ary Jesosy nandrara azy ireo tsy hilazalaza na amin’iza na amin’iza. Kanefa na dia norarana aza izy ireo, vao maika nampiely izany bebe kokoa. Dia gaga tanteraka ny olona, ka niteny hoe: “Nataony tsara daholo ny zavatra rehetra. Nataony mandre aza ny marenina ary miteny ny moana.”